- • O Ilustre Colexio da Avogacía de Ourense outorga amparo á letrada sancionada e persóase no procedemento, elevando o caso a unha cuestión de defensa dos dereitos de todo o colectivo
Ourense, 2 de marzo de 2026 – A Praza 1ª da Sección de Instrución do Tribunal de Instancia de Ourense (antigo Xulgado de Instrución nº 1) remite á Sala de Goberno do Tribunal Superior de Xustiza de Galicia (TSXG) o recurso interposto por unha letrada do Ilustre Colexio da Avogacía de Ourense (ICA Ourense) contra a sanción imposta polo titular do Xulgado de Instrución número 1 de Ourense por exercer o seu dereito fundamental á folga.
Este recurso conta co amparo e coa personación formal do Ilustre Colexio da Avogacía de Ourense, que respalda á súa colexiada na defensa dos seus dereitos. Os feitos teñen a súa orixe no marco da folga indefinida convocada polos profesionais da Quenda de Oficio para reclamar a dignificación das súas condicións. A letrada, en cumprimento da convocatoria do sindicato VENIA, comunicou a súa inasistencia a unha dilixencia xudicial, o que motivou a apertura dun expediente disciplinario por parte do maxistrado-xuíz, culminando nunha sanción económica.
Nun paso de gran relevancia institucional, o ICA Ourense outorgou amparo colexial á letrada e persóase no procedemento. Esta actuación subliña o respaldo do colectivo á profesional sancionada e converte a defensa deste caso nunha cuestión que atinxe a toda a avogacía, defendendo o lexítimo exercicio dos dereitos que asisten aos profesionais da Quenda de Oficio.
O recurso argumenta que a sanción vulnera o artigo 28 da Constitución Española, que recoñece o dereito á folga como un dereito fundamental. Sostense que a incomparecencia a un acto xudicial por este motivo non constitúe unha “causa inxustificada”, senón o exercicio dun dereito constitucional.
Ademais, incídese na resolución de amparo colexial e no feito de que a competencia para determinar a legalidade ou ilegalidade dunha folga corresponde exclusivamente á xurisdición social, tal e como establece o artigo 2 da Lei reguladora da xurisdición social, e non ao xulgado de instrución que impuxo a sanción.
Este caso considérase un fito na loita dos avogados e procuradores da Quenda de Oficio. O colectivo denuncia a precariedade do servizo, que prestan como un servizo público esencial para a Administración de Xustiza sen teren recoñecidos dereitos laborais básicos. A sanción é vista como un intento de obstaculizar a única ferramenta de presión coa que contan para reclamar unhas condicións xustas.
A decisión que adopte a Sala de Goberno do TSXG sentará un precedente sobre a protección dos dereitos dos avogados da Quenda de Oficio en Galicia e a súa capacidade para defender os seus lexítimos intereses profesionais.
- La Región. A sanción a unha avogada por secundar a folga, no TSXG
- La Voz de Galicia. Recórrense ante o TSXG a sanción a unha avogada que non asistiu a un cliente por exercer o seu dereito á folga
- Faro de Vigo. Recórrense ante o TSXG a sanción a unha avogada por secundar a folga
- Galicia confidencial. Colexio da Avogacía de Ourense ampara a la letrada sancionada por no asistir durante huelga a una diligencia judicial
Galician 
Spanish